Islamabadimi moskémik tiguaasoqarpoq
Pakistanip illoqarfiisa pingaarnersaanni Islamabadimi moské aappalaartoq musliminit ingasaassiniartunit ilinniarnertuunit tiguarneqarpoq, maannalu sakkutuunit politiinillu aamma ungusimaneqalerluni.
Shariamik inatsisiliortoqarnissaa moské-mik tiguaasut piumasaraat. Tiguaasut Lal Masjid-imik imminnut taagortut arfineq-pingasunngortinnagu moskémit anereersimassasut Pakistanip oqartussaasuisa piumasarisimagaluarpaat, sulili qisuariartoqanngilaq. Tuluit nutaarsiassaqartitsiviat Reuters taama allappoq.
Moské-p silataani ippassaq eqqissiviilliortoqarpoq, politiillu sakkutuullu moské kinguninngua unguaat.
Eqqissiviilliortoqarmat inuit aqqaneq-marluk toqutaapput 140-llu ikiligaallutik.
Imminut toqoriaatigalutik qaartartumeerisartut sukannersumik akiorniarlugit Pakistanimi naalakkersuisut nalunaaruteqarput.
Moskémik tiguaasut politiinit saassunneqassappata qaartartumeerisarnissamik siorasaarigaluarput.
Moské-p eqqaani inuit unnuaq aneqqusaajunnaarsitaapput, takunnittullu oqarput najummassimanartorsiortoqaqisoq.