Foreningen Grønlandske Børn aningaasaliiffigineqarpoq

Danmarkimi nipilersornermik festivali, tassalu Roskilde Festival sisamanngorpat aallartittussaq tusarnaarianut ippassaq ammarneqarpoq. Roskildep aningaasaateqarfiata suliniutinut assigiinngitsunut aningaasaliissutai ippassaq tusarliunneqarput.

Aningaasat 50.000 koruunit kalaallit meerartaannut atugassatut aningaasaliissutigineqarput, taakkulu peqatigiiffimmut Foreningen Grønlandske Børn-imut tunniunneqarput.

Aamma nakorsat killeqarfiit akimorlugit sulisartut kattuffiat aningaasaliiffigineqarput, taakku 1 million koruuninik tunineqarmata. Aningaasat taakku Darfurimi ilaqutariinnut qimaasunut nakorsaatinik pisariaqartitsisunut atugassatut immikkoortinneqarsimapput. Taamatuttaaq inuit pisinnaatitaaffiinik sorsuutiginnittoq Amnesty International 425.000 koruuninik kiisalu ikiuiniaqatigiiffik Folkekirkens Nødhjælp 525.000 koruuninik aningaasaliiffigineqarput.

Roskilde Festival siorna 16 millioni koruuninik sinneqartooruteqarpoq, sinneqartoorutit suliniutinut ikiuiniarnernut tunngasunut agguaanneqartarput.