Siverth K. Heilmann: Qimminik naalliutsitsineq akuersaarsinnaanngilarput

Naalakkersuisut uumasunik naalliutsitsineq akuersaarsinnaanngilluinnarpaat, taama Siverth K. Heilmann nalunaarpoq.

Sisimiuni qimminik naalliutsitsimanernit assit TV-kkut Sermitsiamilu saqqummiunneqartut Naalakkersuisut annilaassutigaat.

-Taamatut uumasunik naalliutsitsinerit paarsinerluinerillu kanngunarluinnartuupput Naalakkersuisuniillu akuersaarnartinneqanngilluinnarlutik, allappoq.

Taamaattumik naalakkersuisut neriupput Sisimiuni politiit taamatut pinnissimasunik ujaasinermi innuttaasunit ikiorluarneqarumaartut, kusanaatsuliortut paasineqarpata akisussaatinneqarniassammata.

- Kaammattuutigissavarput inuit taamaaliorsimasunik ilisimannittut politiit qulaajaaniarnerinut ikiuuteqqullugit, Siverth K. Heilmann oqarpoq nangillunilu:

- Alianartuuvoq inoqatitta ilaasa uumasunik isiginninnerput iliuutsimikkut tusaamanerluuteqalersittarmatigut, pingaartumik piffissami matumani qimmit qimuttut ilaasa atugaat pillugit ilorraap tungaanut saatitsiniarnerup nalaani. Taamaattumik Naalakkersuisuniit naqissusissavarput qimmit qimuttut atugaat pitsanngorsarniarlugit suliniutit sakkukillisinnagit ingerlateqqinneqassammata, Naalakkersuisoq allappoq.