Henrik Leth GA-mi pisortanngussaaq
Kalaallit Nunaanni Sulisitsisut Peqatigiiffianni GA-mi ukiorpassuarni allaffimmi pisortaasoq Ole Rud atorfimminit tunuartussanngorpoq, atorfimmilu atorfinitsinneqarpoq Henrik Leth, Royal Greenlandimi pisortap tulliatut atorfimminit una qaammat naappat tunuartussaq.
Ole Rud ukiamut 60-inik ukioqalersussaq, GA-mi ukiuni 13-ini pisortatut sulereerluni soraarniuteqarpoq, ilaquttani piffissaqarfiginerujumagamigit. GA-li qimanngikkallalaassavaa, tassami Sulisitsisut Peqatigiiffianni Henrik Leth, siunnersortitut septembarip aallaqqaataani atorfinippat ukiup naanissaata tungaanut suleqatigigallassavaa, kingornalu siunnersortitut immikkut paasisimasalittut seniorrådgiver-itut GA-mut attaveqartuarnissaa isumaqatigiissutigineqartoq, GA-mi siulersuisut siulittaasuat Henrik Sørensen oqarpoq.
- Ole Rud pikkorilluni ullutsinnullu malinnaalluni pisortaavoq, pingaartumik nunami pisunut qanimut malinnaanermigut sakkortuumik politikkikkut isummersortarnini ilisimaneqaatigalugu. Suleqatigiiginnarnissaalu qilanaaraarput, siulittaasoq oqarpoq.
Henrik Lethip, 45-nik ukioqartup, inatsisartut ombudsmandiat Vera Leth nuliaraa. Henrik Leth nunatsinni 1988-imili, siullermik Inuussutissarsiornermut Aalisarnermullu pisortaqarfimmi sulisimavoq, ilaatigut pisortatut, 1995-imilu Royal Greenlandimi sulilerpoq.
GA suliffeqarfiit 340-t ullumikkut ilaasortaaffigaat.