USA-mi præsidentip siulersuinera akerlilerneqarpoq
USA-mi kongressi demokratinit amerlanerussuteqarfiusoq præsident Buship siulersuinera akerlilerlugu nutaamik iliuuseqarnialerpoq. Senatip eqqartuussisoqarnermut ataatsimiititaliaa tassaavoq Bushimik, vicepræsident Dick Cheneymik inatsisinillu atortitsinermut ministereqarfimmik eqqartuussisunut sassartitsisoq, pappiaqqat uppernarsaatissat siulersuinermi nalunngikkaluarlugu unioqqutitsumik iliuuseqartoqarsimaneranik takussutissat tunniunneqaqqullugit, Buship peqqarniisaarniartunik akiuiniarnermi isertortumik naalaartarnissat akuersissutigimmagit.
Peqqarniisaarniat al-Qaedameersut timmisartut ilaasartaatit tiguarneqartut atorlugit World Trade Center nungutimmassuk Pentagonilu putorujussuarmik putullugu, Buship siulersuinerata peqqarniisaarnianut ilungersorluinnartumik sorsunnera aallarnerneqarpoq, malittarisassanik inatsisinillu assorsuaq sangutitsisumik. Tamatumani ilaatigut naalaarnissaq annertooq pineqarpoq Bushimit akuersissutigineqartoq aammalu USA-p nunallu allat akornanni e-mailit telefonikkullu oqaluussinerit millionillit USA-p naalagaaffittut isumannaallisaanermut suliffeqarfiini amerlaqisuni nakkutigineqalernerannik kinguneqartoq. Taamatut iliuuseqarneq inatsisinik unioqqutitsineruvoq, tassami isertortumik suliniartut USA-mi eqqartuussisunit akuerineqaqqaaratik naalagaaffimmi innuttaasunik naalaarniarsimammata. Præsident Buship tamanna pisariaqarsorinnginnerarpaa, pissutigalugu taamatut peqqussuteqarnissani nammineq præsidentitut sorsuttutut piginnaatitaaffimminut ilaammat. Kisiannili tamanna atorsinnaanngilaq, taama naalagaaffimmi eqqartuussiviit aalajangerput. Naalaarnerillumi aamma unitsinneqarput, imatut paasillugu, taamatut iliuuseqarnerit unioqqutitsinerujunnaarsinneqarmata isertortukkullu suliniaqatigiiffimmut allamut nuunneqarlutik, taakkualu eqqartuussisut aalajangiinerat isumagisimassagunarlugu. Kisiannili Buship, vicepræsident Cheneyp inatsisinillu atortitsinermut ministereqarfiup ilisimasimanerlugu taamatut iliornertik aallartikkamikku inatsiseqarneq eqqarsaatigalugu paasisoorteriaannaallutik? Naatsumik oqaatigalugu, USA-p præsidentiata nalunngikkaluarlugu inatsisit ingalassimaniarsimanerlugit? Tamannalu tassaavoq kongressip demokratinit amerlanerussuteqarfiusup akissutissarsiumasaa oqartussaasut pingasuusut taakkua eqqartuussisunut sassartinneqarnerisigut. Tamanna Amerikamiut siulersueriaasianni imaannanngitsumik alloriarneruvoq, præsidenteqarfiup kongressimilu qinikkat oqaluttuarisaanermi aatsaat eqqartuussiveqarfinni suliassanngortinneqarnerannik kinguneqarsinnaasoq. Demokratit taamaalillutik Buship siulersuineranut naalakkersuinikkut nutaamik sorsunneq aallartippaat, siorna qinersivissap tungaanut qinersigallarnermi ajugaareerlutilli. Demokratit Bush Irakimi sorsunneq pillugu saassutaraat, inatsisinik atortitsinermut ministereqarfiup eqqartuussisunik kissaatiginartinneqanngitsunik naalakkersuineq aqqutigalugu soraarsitsinernik suliaani, kiisalu maanna unioqqutitsilluni naalaartarnermik kusanaatsuliami.
USA præsidentissarsiorluni qinersinissamut piareersarpoq.
