Ilinniaqqinnissamut piukkunnarsaasoqalerpoq

Ilinniartitsisussaaleqinerujussuup qaangerniarnissaanut suliniutit ilagaat, timelæreritut atorfillit najugaq qimannagu ilinniartitsisunngorniartarnermut ajornannginnerusumik isersinnaalernissaat. Ukiamut siulliit aqqaneq-marluk piareersaataasumik pikkorissartinneqalissapput, aappaagu januaarimit najugaq qimannagu ilinniartitsisunngorniarsinnaalernissaat siunertaralugu.

- Ukioq manna ilinniartitsisunngorniarlutik qinnuteqartut akornanni timelærerit piukkunnarluartut GU-qqaarnissamulli piumasaqaatinik naammassinnissimanngitsut qinnuteqaqataasimapput. Taakkunannga aqqaneq-marluk ukiamit juullip tungaanut pikkorissartinneqartussanngorput, januaarimi najugaq qimannagu ilinniartitsisunngorniat nutaat aallartippata aallarteqataasinnaalernissaat anguniarlugu. Ilinniartitaanermut Pisortaqarfimmi pilersaarusiornermut ataqatigiissaarisoq Kunuunnguaq Fleischer taama nassuiaavoq.

Inuussutissarsiutinik allanik soorlu isumaginninnermut imaluunnit niuernermut tunngasunik ilinniarsimasut ukiorpaalunnilu timelæreritut sulisimasut piukkunnarluartutut nalilikkat matumani pineqarput.

- Aallartittussat ataasiakkaarlugit pilersaarusiuuteriarlugit kalaallisut, danskisut matematikimillu ilinniartinneqassapput, fagit kingornatigut aamma ilaneqarsinnaajumaarput. Tamatuma kingorna ungasianit ilinniartitsisunngorniatut suliitigalutik pineqassapput. Kunuunnguaq Fleischer erseqqissaavoq.

Aamma oqarpoq, periuseq tamanna iluatsissappat siunissami ataavartumik timelærerinut piukkunnarluartunut neqeroorutigineqartalissasoq.

Timelærerit siunissaq qaninnerusoq eqqarsaatigalugu 100-it ilinniartitsisutut allagartartaartinneqarsinnaanissaat taamaalilluni anguniarneqarpoq.