al-Qaedakkut akiorniarlugit amerikamiut Bagdadip avannarpasissuani saassussillutik aallartipput.
Sakkutuut 10.000-t Irakip illoqarfiisa pingaarnersaata, Bagdadip, avannarpasissuani peqqarniisaarnianut al-Qaedakkunnut saassussisussanngortinneqarsimapput. Sakkutuullu taakku qulimiguulinnit qamutilinnillu ikiorneqassapput.
Amerikamiut sakkutuui ullaaq manna taama ilisimatitsipput.
- al-Qaedakkut tamaani nunap ilaani pissaaneqarnerujussuat, innuttaasunullu qunutitsinerujussuat, nungutikkusupparput, taama amerlatigisunik sakkutuuliinitsinni tassa siunertarput, amerikamiut sakkutuuisa ataatsimoortut generaliat, Mick Bednarak, oqarpoq.
Saassussineq aallartissimatsiaannartoq, nalunaaquttap akunnialunnguisa ingerlaneranni, sakkutuut islamiusut 22-t toqutaareerput.
Saassussineq taaguuteqartinneqarpoq "Operation Arrowhead Ripper" illoqarfimmilu Baqubami, al-Qaedakkut Irakimi qitiusumik najugaqarfiginerusaattut ilisimaneqartumi, ingerlanneqarnerulluni. Saassussineq qanoq sivisutigisumik pissanersoq maannamut suli ilisimaneqanngilaq.