Kalaallit Herstedvesterimi inissitat pillugit nalunaarut ualeq manna saqqummiunneqarpoq, nalunaarusiortualu inatsisinut ilisimatooq Evy Frantzsen aperaarput, suna maluginiarnerpaasimaneraa, imalu akivoq:
- Apeqqut imaaliallaannaq akissallugu ajornakusoortippara, taasassat amerlangaarmata. Herstedvesterimiittulli atugarisaannik ilisimaqarpallaannginneq tupaallaatiginerpaasimallugu oqarsinnaavunga. Evy Frantzsen oqarpoq.
Kalaallit 1979-imit 2006 ilanngullugu Herstedvesteriliartinneqartartut pillugit paasissutissat toqqortaatit misissuinermi tunngavigineqarput, taakku malillugit manna tikillugu aallartitsisarnerit 113-it pisimapput. Herstedvesteriliartinneqarsimasut inuusunnersaat 16-inik ukioqarpoq ukioqqortunerpaarlu aallartinneqarsimasoq 50-inik ukioqarluni. Amerlanerpaartaat aallartinneqarnerminni danskisut oqalussinnaanatillu paasisinnaarpianngillat, ilarparujussuilu manna tikillugu suli taamaallutik.
Evy Frantzsen nassuiaavoq, paasissutissanik katersiniarneq pisariusimaqisoq, paasissutissat ataatsimoortillugit katersorneqarsimanngimmata ilaallu pigineqarunnaarsimallutik.
- Taamaattumik paasissutissanik katersuiveqartariaqalerpoq. Evy Frantzsen oqarpoq.
Evy Frantzsen aamma isumaqarpoq, nunatsinni matoqqasumik parnaarussiveqalernissaq eqqartorneqartillugu isumaliutissat amerlaqisut. Assersuutigalugulu Herstedvesterimi periuseq assiliinnarlugu isertitsiviliortoqarnissaa inassutiginartinngilaa.
Taamatuttaaq aalajangersimasumik sivisussusiligaanngitsumik parnaarussivimmiittussanngortitsisarnerit ingerlatiinnarneqassanersut isumaliutigilluaqquaa.
- Aalajangersimasumik sivisussusiliinissaq pitsaanerussanngila? Qanoq sivisutigisumik parnaarussivimmiinnissaq nalullugu inummut toqqissisimananngilaq. Evy Frantzsen oqarpoq.
Evy Frantzsenip Kalaallit Herstedvesterimiittut pillugit nalunaarusiani siorna maajimili suliaralugu aallartissimavaa.