Nunarput USA-lu niueqatigiinnerulissapput

USA-p Danmarkillu nunanut allanut danskit aallartitaqarfiata Washingtonimiittup suleqatigineratigut inuussutissanik avammut niuernerup ukiamut aallartisarneqarnisaanut tunngatillugu isumasioqatigiittoqassaaq, seminarimik taasamik. Tamatuma saniatigut aningaasalersuinissanik ukiup ingerlanerani isumasioqatigiittoqassaaq, amerikamiut nunatsinnut aningaasalersueqataarusuttut kajumilersinniarlugit.

Joint Committeemi suleqatigiinneq Igalikumi 2004-mi isumaqatigiissutinik tunngaveqarpoq. USA-p nunattalu suleqatigiinnerulernissaat taamanikkut ataatsimiinnermi isumaqatigiissutigineqarsimammat, niueqatigiinneq, takornariaqarneq ilinniartitaanerlu eqqarsaatigalugit.

Ilulissani ataatsimeeqatigiinnermi ikinngutigiittut aamma aalajangersaavigineqarpoq Nunarsuarmi Kulturikkut eriagisassat, Ilulissat Kangerluata kiisalu Cape Krusenstern Parken Alaska-miittup, qanimut suleqatigiinnerulernissaat. Taamaalillutik Nunarsuarmi Kulturikkut eriagisassatut toqqagaasimasut taakkua akunnerminni takornariaqartuaannarnissamik misilittakkatik isumasioqatigiissutigisassammatigik.

Ataatsimeeqatigiinneq Inerisaaviup aamma pissarsia-qaatigilluarpaa, Inerisaavik tuluttuinnaq oqaasilimmik ilinniartitsisussamik nunaqarfinnut illoqarfinnullu mikinernut tuluttut ilinniartitsiartortussamik angalaartitsisinnaanngormat.

Joint Committee, nuna qeriuaannartoq pillugu ilisimatuunik misissuisussanik, tamatuma saniatigut angalatitsisussaavoq.