Naalakkersuisunut ilaasortaasimasoq Jens Napãtôk', maanna Upernavimmi najugaqartoq, Qaanaami imigassap matuneqarneranut oqallisaaqisumut maanna akuliuppoq.
Tassa ukiualunnguit matuma siornatigut Illoqqortoormiuni borgmesteriugallarmat kommunemi innuttaasut apereqqaarnagit aamma imigassaq matuneqarnikuuvoq.
- Nammineq inuttut misigereernikuuara qanoq ajortigisoq Naalakkersuisut qulaaniit akulerullutik imigassaq matummassuk, Jens NapãtôK' oqarpoq, taamanikkut matusisoqarmat akerlioqisoq.
Maannali Jens Napãtôk'-p imigassamik matusinerup innuttaasunut iluaqutaasimanera nassuerutigaa – ingammik kingumut qiviarluni taama nassuerpoq.
- Taamanikkut imigassaq matuinnarneqarani qanoq iliuusissanik pilersaarusiortoqarpoq, tamanna ajornartorsiummut iliuuseqarneruvoq pitsaasoq, Jens NapãtôK' isumaqarpoq.
Taamaattumik oqallinnermi imigassap qitiutinneqannginnissaa kaammattuutigaa.
- Siunissami iliuuserineqarsinnaasut pingaartinneqarnerunissaat pingaartuuvoq, taamaalilluni siunissami imigassamik ajornartorsiutaasinnaasut pinngitsoorumallugit.
Taamaattorli Jens NapãtôK'-p naalakkersuisut imigassaq Qaanaami ammaqqissagaat neriuutigaa, soorlu Qaanaarmiut tamanna kissaatigigaat.
Naalakkersuisut qanittukkut Qaanaamut tikeraarniarnerat aamma nuannaarutigaa.