Ippassaq Island-imi inatsisartunut qinersisoqarmat, Island-ip statsministeria konservativiusoq, Geir Haardes, ajugaaqqippoq. Ukiunili 16-ini konservativit naalakkersuisooqatigisimasaat qinersisartunik annaasaqangaatsiarput.
Konservativit qinersisartunit 36,6 procentinit taaneqarsimapput, maannamullu naalakkersuisooqatigisimasaat Liberale fremskridtspartiit kinguariarlutik, 11,7 procentiinnarnik qinersisartunit taaneqarsimapput.
Konservativit maannamut naalakkersuisooqatigisimasaat Fremskridtspartii, konservativinit suleqatigiinnarneqassanersut, apeqquserneqarpoq.
- Islandimi qinersineq Hardees-ip nammineq ajugaanermisut tigugaa malunnarpoq, ilimaginngilaralu ukiuni 16-ini naalakkersuisooqatigisimasatik suleqatigiinnassagaat, Islandimi politikkikkut malinnaalluartartoq Jon Hakon Magnusson oqarpoq.
Naalakkersuisooqatigiit ukiuni 16-ini suleqatigiissimapput, suleqatigiinnerminnilu Island nunarsuarmi pisuujunersaat ilaannut ilanngussimapput.
Ilimagineqarpoq, saamerliunerusut taaguteqartut Den Grønne Bevægelse, qinersisartunit 14,3 procentinik taaneqarsimasut, konservativinit suleqatiginiarneqassasut.