Karen Littauer: Qaanaami meeqqat sumiginnagaapput

Qaanaami angajoqqaat aalakuungaarnertik taamaalillutillu nakkutiginnissinnaannginnertik pissutigalugu meeqqatik kaatsittarpaat. Taama Karen Littauer Qaanaami pissutsit pillugit Danmarksradiomut oqaluttuarpoq.

Karen Littauer siornagut 43-riarluni Nunatsinniittarsimavoq meeqqanut inuusuttuaqqanullu suliniutinik assigiinngitsunik suliaqartarluni.

Karen Littauerip Qaanaami meeqqat inuusuttuaqqallu qaammatini pingasuni kingullerni meeqqat inuusuttuaqqallu ornittagaannut attuumassuteqartumik sammisaqartissimavai, Qaanaarmiuaqqallu atugaat assut quarsaarutigisimagini Danmarksradiomut oqaluttuarpoq.

- Aatsaat taama pissutsinik ajortigisunik takuvunga, kikkut tamarmik ernguttarput, snapsiunerusorlu imertarlugu, Karen Littauer DR-mi issuarneqarpoq.

Oqarpoq ilaqutariit imigassamik ajornartorsiuteqanermik tamarmik eqqugaasimasuusut, meeqqallu tamanna ulluinnarni misigisaraat.

- Meeqqat imminnut annaanniarlutik ataqatigiinniarsarisarput sivisoorujussuarmillu aneertarlutik, uanga allarpassuillu isumaqarpugut pissutsit tamakku meeqqat pisinaatitaaffii pillugit kommissionemut unnerluutigineqartariaqartut, Karen Littauer Danmarksradiomut oqarpoq.

Karen Littaueri oqarportaaq Qaanaami annertuumik ilinniartitsisussaaleqisoqartoq, atuartullu ilaat tallimanngornikkut ilinniartitsisussaqannginnamik atuartinneqarneq ajortut.

Karen Littauer suleqatinilu Orto Ignatiussen

meeqqanut sullissisimanertik pissutigalugu siorna nersornaasigaasimapput, Karen Littauerilu isumaqarpoq Qaanaami meeqqat pillugit imigassaq matuneqartariaqartoq. Danmarksradio taama nittartakkamini allaaserinnippoq.