NyAlliance Khaderikkut pilersippaat

Dansk Folkepartip aallartinneqarnerata kingorna aatsaat Danmarkimi nutaamik partiiliortoqaqqippoq.

NyAlliance tassaavoq partiip nutaap atertaava – tassami partii nutaaq aterminut naleqquttumik nutaamik peqatigiiffiuvoq.

Qinersinerni taaguunneqarluartartoq Naser Khader Radikale Venstre-nit anivoq – aamma taamaaliorpoq EU-parlamentimi ilaasortaq Anders Samuelsen. Partiimi nutaami aallartitsisut pingajoraat Gitte Seeberg naalakkersuisoqataasunit Konservative Folkepartimit ilaasortaajunnaaqqammersoq.

Partii nutaaq tusagassiortunik katersuutsitseqqammerpoq – tassani siulittaasunngortussap Naser Khaderip isertuutinngilaa danskit naalakkersuinermik ingerlatsineranni partiit qiterlernik taaneqartartut amerlanerulernerat – pingaartinneqartussaq tassaavoq saamerliuniat talerperliuniallu periarfissinneqanginnissaat:

- Qinersisartut amerlasuut qiterlerneersunit naalakkersuisunik pilersitsisoqarnissaa kissaatigigaluarpaat, kisianni saamerliuniat naalakkersuisunngornissaat aamma kissaatigineqanngilaq. Aammattaaq ullumikkut danskit naalakkersuinermik ingerlatsineranni kiisalu Danmarkip ineriartorneranut Dansk Folkepartip sunniuteqarnerujussua nuannarineqanngilaq, taamanna aamma uagut qatsulluinnarparput. Isumaqarpugut qinersisartut amerlasuut qiterlerneersunit naalakkersuisoqalernissaq kissaatigigaat, tassa talerperliuniarnerpaat saamerliuniarnerpaallu oqaasissaqarpallaarunnaarsillugit, Khader oqarpoq.

Konservativit sinnerlugit Europaparlamentimi ilaasortap Gitte Seebergip partiiminit aninerminut pissutaasoq isertuutinngilluinnarpaa:

- Aalajangerninnut ilaatigut patsisaavoq Dansk Folkepartimik suleqateqarnerup annertusivallaarsimanera. Ingammik avataaniit nunasisunut atatillugu, EU-mut atatillugu aamma nunarsuarmioqataanitsinnut atatillugu, Gitte Seeberg oqarpoq.

Partiimik nutaamik pilersitsisut danskit inuussutissarsiornermik ingerlatsisuinit nuimasunit tapersersorteqalereerput – tassa Asger Aamundimit aamma Lars Kolindimit – taakkua konservativit Dansk Folkepartimik suleqateqarnerat isornartorsiortareerpaat.

Anders Samuelsen aamma Gitte Seeberg Europaparlamentimi ilaasortaaginnassapput aamma Naser Khader Folketingimi ilaasortaaginnassaaq.