Robert Peary II: - Inuup oqaatsini ataqqinaatigai

Avanersuarmiup Miniup inuuneranik piviusulersaarutitut filmiliaq ”The Prize of The Pole” Katuami ippassaq takuteqqaarneqareermat filmertarfik tamaat inunnik ulikkaarlugu nuannarineqaqaluni isiginnaarneqarpoq.

Filmimi pingaarnertut inuttaasoq Robert Peary aappaat aperaarput, inuit filmi takoreermassuk qanoq issimanersoq.

- Taamarsuaq persuarsiutaanissaa naatsorsuutiginngikkaluarpara, pissangaginerusimagaluarpara inuit qanoq tigujumaarneraat. Taamaattumik annertoorujussuarmik persuarsiutigisutut pimmassuk qamuuna assut nuannaarutigeqaara, Robert Peary II taama oqarpoq.

- Minik Amerikamiitsilluni nunaminut angerlarserpoq, tikikkaluaramilu pakatsivoq taamalu Amerikamut uteqqilluni. Filmimilu uagut ujarlernitsinni paasiartuinnarsimavara Minik uagutsitorluinnaq inuuneqarsimasoq, soorlu uagut aamma marloqiusatut inuusugut. Paasiartulersimavaralu inuuneq kukkunerunngitsoq inuugaanni qallunaajugaluaraanni imaluunniit Amerikarmiuugaanni, taamaattumillu Inuk / kalaaleq misigisimasariaqanngitsoq kukkusumik inuuneqarluni allatut eqqarsarluni pissuseqarlunilu inuuguni, tassami taamaattussaavoq taannalu ataqqillugulu tulluusimaarutigisariaqarpaa, nalilersortariaqanngilarluunniit inummi ataqqisariaqarpoq oqaasiinut allaat ataqqisariaqarput, Robert Peary II oqarpoq.

Filmi kalaallisut tuluttullu oqaasertaqarpoq. Filmi Ilulissanut Qaanaamut Siorapalummullu takutikkiartorneqassaaq. Aammattaaq sapaatip akunnerata naanerani Katuami marloriarlugu takuteqqinneqarnissaa aaqqinneqarsimavoq.