Issittumut tunngasunut allaffeqarfik nutaaq ammarneqalerpoq
Issittumut tunngasunut allaffeqarfik nutaarluinnaq Kangerlussuarmi sapaatip akunnerata tulliani ammarneqassaaq. Taamaalillutik Danmarkimi Issittuni pissutsinik ilisimatusarfiup Namminersornerullutik Oqartussat peqatigalugit Nunat tamat Issittumut ukiorititaat ammaaffiginiarpaa.
Allaffeqarfimmit sullinneqartussat tassaapput ilisimatusartut tuusintilikkaanik amerlassuseqartut aasaanerani nunatsinnut tikerartussat. Tamanna ilisimatusarnermik ataqatigiissaarisup Henning Thing-ip Danmarkimi Issittuni pissutsinik ilisimatusarfimmeersup ima nassuiarpaa.
- Kangerlussuarmi ilisimatusartunut akunnittarfimmi maajip aallartisimalerneraniit aggustip naanerata tungaanut ilisimatusartorpassuit Kangerlussuakkoortussat sullinniartussaavavut.
Soorlu akuersissutinut nutaanut tunngasut aamma paasissutissanik allannguisoqartillugu paasissutissiissutigisassavavut. Ilaatigut pappilissanut tunngasut kalaallit danskilluunniit oqartussaasuinut ingerlateqqitassat isumagisassavavut.
Aamma takornariat allalluunniit Kangerlussuakkut aqqusaartut Nunat tamat Issittumut ukiorititaat pillugu paasissutississinnaavavut, suut nunatsinni ilisimatusarfigineqarnersut oqaluttuaralugit, ingammik Kangerlussuup eqqaani suut ilisimatusarnikkut ingerlanneqarnersut kiisalu naqitanik paasissutissanik tunniussisassalluta.
Aammattaaq aasaanerani ilisimatusarnerit pillugit oqalugiartitsinernik ingerlatsisassaagut. Taamaattumik Kangerlussuarmi najugaqaraanni imaluunniit angalanermut atatillugu unnuisariaqaleraanni ilisimatusartut suliatik pillugit oqalugiartut tusarnaariarneqarsinnaapput.
Ilanngullugu oqaatigisinnaavara inersuarmi tikittut iseqqaarfigisartagaanni Nunat tamat Issittumut ukiorititaat pillugu assilisanik kusanartorsuarnik takutitsisarniaratta.
Taamatut iliuuseqarnitsigut siunertaraarput, ilisimatusartut ilisimatusagaasalu kikkunnut tamanut takusassiarinissaat, ilaatigut anguniarlugu meeqqat inuusuttullu ilisimatusarnermut soqutiginnilersinnissaat. Taakkumi inersimalerunik ilisimatusarnermik aallussaqalerniassammata, Henning Ting Oqarpoq.
Henning Thing-ip naatsorsuutigaa ilisimatusartut 3.000-it missaat ikiortaasussallu tuusintit arlallit Nunat tamat Issittumut ukiorititaannut atatillugu nunatsinnut tikikkumaartut. Kangerlussuarmi allaffeqarfissaq maajip pingajuannit aggustip 25-annut ammatinneqassaaq.
