Europami tusagassiortut Canadami puisinniarneq malinnaaffigaat
Tusagassiortut Europameersut qulit, Nunavummi New Foundlandimi Labradorimilu puisinniartariaatsinik takusaanissamut Canadap naalakkersuisoqarfianit qaaqqusaasimasut, sapaatip akunnerani kingullermiit ullumi ilanngullugu, puisinniartariaatsinik takuniaatinneqarsimapput, taamalu qaaqqusineq isumassarsiatsialaasoq, kingusinaartumilli iliuseqarnerusoq, Danskit tusagassiortui sinnerlugit Danmarkimit peqataasoq Steen Johannesen, Canadamiut nutaarsiassaqartitsiviannut cbc-mut oqarpoq.
- Tassami Canadamiut puisinniartarnerat pillugu Europami qinikkat isummereernikuupput. Canadamiut puisittaasa amiinik eqqussuinermut Europami nunat arlallit akerlilersuilernikuupput, tamakku oqaluliinnartulli Canadamiut iliuuseqajaarlutik qangali tikeraartitsisimasinnaagaluarput, Steen Johannesen erseqqissaavoq.
Puisit amiinut Europami akerliuniartoqalernerata kingunerisaanik Canadamiut februaarimi aamma taamatut tikeraartitsisimapput, tikeraatitsinerillu taamaattut, puisinniartarnermut akerliuniat iliuuserisartagaannit isumassarsiaasut cbc-mi allaaserineqarpoq.
