Kommunenik iluarsartuusseqqinneq Inatsisartut ataatsimiinneranni akuersissutigineqaqqammersoq qaqugu aallartinneqassanersoq Inatsisartut suli isummerfigisimanngilaat.
Taamatut erseqqissaateqarpoq Inatsisartut aaqqissuus-saanermik iluarsaaqqinnermi ataatsimiititalianni ilaasortaq; Borgmester, Agnethe Davidsen.
Ullup´qeqqanut Radioaviisikkut kommuneni iluarsartuusseqqinnissamut tunngatillugu ukiumik ataatsimik kinguartitsequsillutik borgmester-it piumasaqaateqarsimanerannut Inatsisartut eqqartuisimanngimmata Qaqortup borgmester-iata, Simon Simonsen-ip, pakatsissutigaa.
- Agnethe Davidsen-ip, tusagassiutinut nalunaaruteqarnermini, oqaatigaa, Simon Simonsen pakatsissuteqarnissaminik pissutissaqanngitsoq.
Paaseqquaalu borgmester-it saaffiginnissutaat maluginiarneqarluarsimammat. Ataatsimiititalia-
miillu apeqquterpassuarnik Naalakkersuisut siulittaasuannut, Hans Enoksen-imut tunniussuisoqarluarsimasoq.
- Borgmester-it Kommuneni iluarsaaqqinnerup kinguartinneqarnissaanik kissaateqarnerat taamaalilluni Inatsisartut Naalakkersuisullu akornanni oqaloqatigiinnissamik pilersitsisoq, Agnethe Davidsen-ip oqaatigaa.
– Aamma oqaatigaa, Aaqqissuussaanermik ataatsimiititaliaq, borgmesterit saaffiginnissutaannik malinnissinnaanerminik neriorsuuteqarsinnaanngitsoq.
- Ipassarlu Inatsisartut aalajangiivigisaat tassaapput, kommunet sorliit, imminnut kattussuutissanersut, tulliullugulu ikaarsaariarnissami ataatsimiititaliamik pilersitsinissaq. Aalajangiinerit taakkua borgmester-it kissaataannik itigartitsinermik imaqanngillat. Taama oqarpoq, Agnethe Davidsen.
Pilersitsivisusumik aalajangiinissat ullormut siullermut kommunet aaqqissuussaanerannut iluarsaaqqinnermut tunngasut inatsisissaq siunnersuutigineqalerpat Inatsisartut ukiamut katersuunnissaanni kiisalu ukiup tulliani upernaakkut Inatsisartut katersuunnissaani aalajangiiffiusussaapput.