Nuummi Nipilersortartut peqatigiiffittaarput
Nipilersortartut akornanni peqatigiiffimmik eqeersimaartumik suliniuteqarusuttumillu pisariaqartitsisoqarnera tunngavigalugu, Nuummi peqatigiiffik pilersinneqarpoq.
Nuummi Nipilersortartut ilaatigut anguniarpaat naapittarfissaminnik pilersitsinissaq, sungiusartarfeqarnikkut periarfissanik pitsanngorsaajuarnissaq tusarnaartitsisarnissallu. Nuummi Nipilersortartut Peqatigiiffittaavata aallarnisarluni ataatsimiinnermini nuna tamakkerlugu nipilersortartut kattuffeqalernissaannut aamma suleqataanissaq aalajangiuppaat.
Alex Andersen, Chilly Friday-ikkunni tumerparpaartoq, Nuummi Nipilersortartut Peqatigiiffittaavanni siulittaasunngorpoq.
Nipilersorneq kalaallit kulturiannut ilaalluinnarmat, nipilersorneq siuarsartariaqarsorineqarpoq, eqqumiitsulioriaatsit allat, soorlu assilialiorneq, filmiliorneq, TV-kkut isiginnaagassiorneq assigisaallu naligalugit.
Sinerissami nipilersortartut peqatigiiffeqareersut ilaatigut tassaapput Aasiaat Sisimiullu.