Poorskip nalaani angalaniat silamit eqqugaapput

Angalasut sinerissami silap ajornera pissutigalugu kinguaattoornermik eqqugaasut, Air Greenlandimit ullumi nalunaarput.

Ilulissaniit Sisimiuniillu Kangerlussuup tungaanut ullumikkut timmisartuussisoqarsimanngilaq, Nuummiit Nuummullu timmisartuussinerit pissusissamittut, annikitsuinnarmillu kinguaattoorfiusumik, ingerlasimasut. Maniitsumut timmisartuussinissaq silap ajornera pissutigalugu ajornassasoq naatsorsuutigineqarpoq.

Kulusummut arfininngormat ullumikkullu timmisartuussinissaagaluaq aamma taamaatinnarneqarsimavoq.

Diskobugtimi aamma Qasigiannguanut Qasigiannguaniillu aamma Qeqertarsuarmut Qeqertarsuarmiillu timmisartuussinerit silap ajornera pissutigalugu kinguaattoorfiusimapput.

Air Greenlandip timmisartorsui imarpik qulaallugu angalasartut nalunaaquttap akunnerata aappaata affaanik kinguaattoorfiusumik Københavnip tungaanut ingerlapput.

Timmisartuussinissat Air Greenlandip amerlisarsimavai, silallu kinguaattoortitsineranit qaavatigut maanna eqqugaapput. Silarlulli taamaaginnassappat kinguaattoorfiusumik ingerlanissaq pinngitsoorneqarsinnaanngilaq.

- Angalasussat kaammattorpavut tekst-TV-kkut nittartakkatsinnilu malinnaaqqullugit, Air Greenlandimit allapput, takorloorpaallu Kangerlussuarmi utaqqisorpassuit ingiffissaqarnissaat ajornakusoorsinnaasoq.