Kræftimut katsorsaariaaseq nutaaq
Ilisimatusarlutik misissuisut katsorsartittut timaannit ilanngaallutik piikkatik laboratoriami amerlisariarlugit napparsimasup timaanut uterteqqittarpaat. Misiligaalluni taamaaliornerup napparsimasut affaat katsorsarsimavai.
Katsorsarneqartunut ilaavoq 41-nik ukiulik Rikke Gintborg, ukiut marluk manna sioqqullugu katsorsarneqarsinnaanngitsumik annissamigut kræfteqalersimaneragaasoq. Taava misileraasunut ilannguppoq, kræfteqarfimminit sananeqaatinik nappaammut akiuuttunik peersiffigitippoq, T-cellenik taaneqartartunik - tassa tamakku kræftimut akiuunniarsarisut.
Misissuivimmi laboratoriami timip sananeqaatai assut sulipilutsinneqalerput milliardinut amerliartortillugit - taakku kingorna Rikke Gintborgip kræftianut utertinneqarput.
Siornatigut minutsini quliniluunniit nikorfasinnaasimanngitsoq maanna arpattuinnanngorsimasoq, aviisi BT ullumi allappoq.
Annissakkut kræftimut T-cellenik katsorsaaneq iluatsilluangaarmat, ilisimatusartut maanna allanik kræfteqartut aamma misileraaffiginialeraat, kræftimut nakorsaq T-cellenullu ilisimatusartoq, Inger Marie Svane, oqaluttuarpoq.
- Aallaavittut oqarusuppunga krætimik nappaatit tamaasa T-cellenik misileraaffigisinnaassagatsigit. Taamaattumik massakkut kræftinut allanut misileraalluta aallartinniarpugut.
Kræftimik nappaatillit taamatut katsorsakkatta affaasa missaannut iluaqutaasimavoq. T-celleterapiimillu katsorsaaneq aamma allamik iluaqutissartaqarpoq.
Katsorsartinnerup nalaani napparsimmavimmi uninngasariaqarpoq, naliginnaasumilli saniatigut allanik sunniinerlunnertaqanngilaq, killormoortuanik kræftimik katsorsartinnernut allanut naleqqiullugu.