NunaMinerals platinisiornermi naammagisimaarinnippoq

Nuup Maniitsullu akornanni, Niaqunngunami, ukioq 2006-imi platinisiornermi inernerit NunaMineralsimit maanna nalunaarutigineqarput, tassa platini sunik akoqarnersoq paasineqarsimasoq. Inernerit ima naammagisimaarneqartigaat, tamaani platinisiornerup ingerlateqqiinnarnissaanut tunngaviusut nakussassarneqarlutik.

Niaqunngunami platinisiornerup takutippaa platineqarluarlunilu, palladiumeqarluarlunilu rhodiumeqarluartoq.

Platin kuultimit marloriaatingajammik akeqarpoq, palladium taassuma affaanik, rhodiumilu kuultip akiata quleriaatingajaanik akeqarluni, NunaMineralsimi pisortaq, Ole Christiansen oqarpoq.

Platinisiorneq akisoorujussuuvoq, akisuneranullu pissutaavoq misissueqqissaartoqarnissaa pisariaqartuummat, aamma naammagittartuunissaq pisariaqarluinnarluni. 2006-imili misissuinermit inernerit ima ajunngitsigaat, misissuinissarput 2007-imi annertusiniarlutigu aalajangerluta, soorlu sumi qillerinissaq paasiniassavarput, Ole Christiansen oqarpoq.

Platin biililiorfissuarnit pingaartumik atorneqartarpoq, tassa biilimiit mingutsitsivallaannginnissaq anguniarlugu biilit katalysatorianut platin atorneqartarmat. Afrika Kujallermi platiniliortarneq 75 procentip missaanik ullumikkut annertussuseqarpoq.

Niaqunngunami misissuineq NunaMineralsimit tamakkiisumik pigineqarpoq.