Qaartiterutit 1,3 tonsit Maniitsumi arsaarinnissutigineqartut
Ikuallattoortoqarneranut Qaartiterutissanullu nakkutilliinermi oqartussaasut Maniitsumi politiit suleqatigalugit qaartitsissutissanik 1,3 tonsit missaanniittunik innattaatillu 8900-nik akuerisaanngitsumik toqqortarineqarsimasunik nassaartoqarpoq, arsaarinnissutigineqarlutillu.
Qaartiterutissanik qaartartuusivimmi nakkutilliinermi oqartussaasunit akuerisaasuni toqqorsisoqarsinnaavoq, Maniitsumili akuerisaasumik qaartartuusivimmik peqanngitsoq, Ineqarnermut Attaveqarnermullu pisortaqarfik nalunaarpoq.
Tamanna tunuliaqutigalugu qaartartut qaartitsissutissallu Maniitsumi entreprenørit ilaannit pigineqartut 1,3 tonsit qaartiterneqarsimapput.
Qaartartuussiveqarnerup ulorianassusaa pisortaqarfiup nassuiarmagu, assersuutitut taaneqarput, Enschede-mi Holland-imiittumi 2000-imi aamma Danmarkimi Seest-imi 2004-mi qummoroortaatinik toqqorsiviit qaarmata. Holland-imi 22-it toqutaapput inissiallu 200-t aserorluinnartut inissiat 300-t ajoquserujussuarput.
