Aputeqanngippat sisorartoqarsinnaanngilaq
Freestyle-mik taallugu sisorartartup nunatsinneersup, Hans-Jacob Brandt Olsenip, Danmarki sinnerlugu nunarsuaq tamakkerlugu Italiami pissartanngorniulluni unammeqataanissaralua unitsiinnarneqarpoq.
Unamminissamik unitsitsineq Italiap aputeqannginneranik patsiseqarpoq. Nunarsuarmi sisorartartut kattuffiat, FIS, taama nalunaaruteqarpoq.
Europami apivallaarsimanngimmat, sisorarnernik assigiinngitsunik unamminissat kinguartoorfiunngikkunik uninngagallarput.
Hans-Jacob Brandt Olsen-ip nunatsinneersup unammissutigisartagaa, Halfpipe-mik taaneqartartoq, aalajangersimasumik sisorarfiliuunneqartarpoq, aputissaalatsinerlu pissutigalugu taamaattumik sisorarfiliortoqarsinnaasimanngitsoq, nunarsuarmi sisorartartut kattuffiat nalunaarpoq.