USA-p Persiami sakkutuuni amerlivai

USA-p sakkutuuni Persiap Kangerliumanersuani amerlisaleruttorpai aamma Iranip Irakillu killeqarfiata eqqaani immikkut timmisartuliillunilu nakkutilliisuliisimavoq. Unnuaq Amerikamiut aammaarlutik Iranimiut Irakimi aaqqiagiinnginnermut akuliuteqqunagit mianersoqqusimavaat.

Qanoq iliallattoqarneratigut qaartoortoqariaannaavoq, sakkutuut piareersarneqarput, sioorasaarinerit sorsunnissarlu oqaatigineqallattaarput.

USA Iranilu imminnut saassuteriaannartut inissisimapput, akeqqersimaartoqarporlu. Paatsuuallattoqarneratigut imaluunniit igeriarnerup ataatsip sorsunneq aallarteriaannaavaa. Amerikamiut naliliisartui sakkutuullu qullersaat taama naliliipput.

Unnuaq Amerikami nunanut allanut ministerimut tullersortaasoq Nicholas Burns Iranimut mianersoqquseqqippoq. Aamma kingumut oqaatigeqqippaa Iranimiut Irakimi shia-musliminut pikitsitsiniartartunut sungiusaasarlutillu sakkunik pilersuisuusut.

- Tamanna piaarnerpaamik unitsinneqartariaqarpoq, Burns oqarpoq.

Amerikamiut Persiap Kangerliumanersuani sorsuutitik ilallugit sorsuummik mittarfilimmik inissiisimapput aamma qaartartut igeriuttakkat piareersimatitatik amerlisimavaat.

Irakimi Amerikamiut sakkutuuinut qullersap tulliata Iranip sakkunik pilersuisuunera uppernarsarsinnaallugu oqaatigaa, tassa sakkut arsaarinnissutigisamik normui naapertorlugit Iranimeersuunerat paasineqarsinnaanerarpaa.

Sapaatip akunnerisa marluk matuma siornagut Amerikamiut sakkutuui tallimat Kerbalami aallarunneqarput toqunneqarlutillu. Aallarussisut Amerikamiut sakkutuuisut atisalersorsimallutillu Amerikamiut sakkuinik sakkulersorsimapput. Amerikamiut sakkutuuisa Irakimiittut oqaatigaat aallarussisut Iranimiuussagunartut.

Ualimut Nicholas Burns-ip sioorasaarutini sakkukillisillugit Amerikamiut Iranimut sassussinissamik pilersaaruteqannginnerarpai.

Iranip Amerikallu akornanni najummassimanartorsiorneq Irakimi naalakkersuisut ernumanartoqartippaat. Irakimi naalakkersuisut siulittaasuat Maliki ippassaq CNN-imut oqarpoq Amerikamiut Iranimiullu aaqqiagiinngitsut ilisimagini.

- Ajornartorsiutisi Irakip avataani aaqqissinnaavisigit? Aperivoq. Aamma oqaatigaa Iraki naammattunik ajornartorsiuteqareersoq.