Silaannaap kissakkiartuinnarneranut pissutaaqataanerpaat ilaannik gassimik toqunartortalimmik C02-mik annikilllisitserujussuarsinnaasoq danskit koruuninngorlugit 140 million koruuninik tunineqassaaq.
Taama neqerooruteqartoq tassaavoq timmisartuutileqatigiiffissuarmik Virginimik piginnittoq Sir Richard Branson.
CO2-mik annikillisitserujussuarnissamut nunarsuaq tamakkerlugu unammisitsinersuarmik Bransonip Londonimi ippassaq ammaaneranut peqataavoq USA-mi præsidentimut tullersortaasimasoq Al Gore.
- Nunarsuaq utaqqeqqissinnaanngilaq, meeqqakka ernuttakkalu siunissaqartariaqarput, nunarsuarmilu inuuneq annaanneqassappat CO2-mik aniatitsinitta qanoq ililluni annikillerujussuartinneqarsinnaanera paasisariaqarparput, Richard Branson oqarpoq. Neriuutigaalu unammineq angusaqarfiulluarumaartoq.
-CO2-mik piiaasinnaasumik nassaaqqaanniunnerup ilikkagassartaa tassaavoq massakkut inissisimanitsinnik akuersaarneq, Al Gore oqarpoq.
Unammersuarnerup inerneranik aalajangiisussaatitaasut tassaapput amerikamiut avataarsualiartitseqatigiiffianni NASA-mi silaannaq pillugu ilisimatooq James Hansen, tappiorannatulerinermillu ilisimatooq James Lovelock.