Irak-imi pikitsitsiniat sakkuaattartut sunnimusliimit sakkuaakkunnaarnissamik USA-mut neqerooruteqarput. Taama tuluit aviisiat The Independent allappoq.
Sakkuaakkunnaarnissamik neqerooruteqartuuvoq Irak-imi musliimini pikitsitsiniat siuttuisa ilaat Abu Salih al-Jeelani.
Pikitsitiniat sakkuaakkunnaarnissamik neqerooruteqartarnerat naliginnaanngimmat, taamatut pisoqarnera tupaallatsitsivoq.
- Aattaqartaqisumik toqoraattarnerit unitsinneqarnissaa anguniarlugu oqaloqatigiissinnaaneq isumaqatigiinniarsinnaanerlu upperaarput, Jeelani Tuluit aviisianut taama oqarpoq, nangillunilu: - USA-p sakkutuuni Irak-imiit aniatissinnaappagit eqqisseqatigiinnissamut tamanna aqqutaasinnaasut ilagaat.
Jeelani-p kissaataasa ilagaat sakkuaakkunnaarnissamut isumaqatigiinniarnissami FN aammalu Islamiske konferenceorganisationip imalluunniit Den arabiske liga-p isumaqatigiinniarnerit aqussagaat.
Kissaataasulli allat, Washington-imit akuerineqarsinnaaneri qularineqarput. Ilaatigut sunnimusliimit sakkuaateqataasarsimasut amerikamiullu sakkutuuinik 1000-ilippassuarnik toqusoqartarneranik pisooqataasut, paarnaarussat 5000-it iperagaanissaat Jeelani-mit piumasarineqarpoq.
- Musliimit sakkuaattartut tigusaasimasut sakkutuujupput, nunaminnillu illersuisarsimanerat USA-mit George Bush-imit akuerineqartariaqarpoq, tigusanik iperaanikkut, Jeelani oqarpoq.
Sunnimusliimit piumasaanut aamma ilaavoq, Irak-imi naalakkersuisut tunuarnissaat, inatsisillu nutaat atuutsinneqalersimasut atorunnaarsinneqarnissaat.