Nunarsuarmi silaannaap allanngoriartornerata kingunerisaanik Indonesia eqqorneqartussanngorsimavoq. Oqaatigineqarpoq Indonesiami qeqertat 2000-t missaanniittut morsuttussanngorsimasut, taama nunani tamalaani nutaarsiassaqartitsivik Reuters allaaserisaqarpoq.
Indonesiami avatangiisinut ministeri Rachmat Witoelar ullumi mianersoqqusivoq, oqarluni Indonesiami ukiumi 2030-imi qeqertat 2000-t missaat morsoreersimassasut.
Tamannalu nunarsuarmi silaannaap allanngorneranik peqquteqartoq erseqqissaatigaa. Silaannaap allanngornerata kingunerisaanik imaq qaffarujussuartussaasimavoq, taamaalillunilu qeqertarpassuit morsuttussanngorsimallutik.
Indonesia qeqertarpassuaqarpoq katillugu 17.000-inik qeqertaqarami. Nunami tassani avatangiisinut ministerip qeqertat morsorarnissaat pinaveersimatinniarlugu iliuuseqarniaraluarpoq, ilaatigut siunnersuutigalugu uuliat silaannarmut mingutitsisuunngitsut atorneqarnerulernissaat.
-Neriuutigeqaarput qeqertagut 2000-t annaassanatigik, avatangiisinut ministeri oqarpoq.
FN-imi ilaasortat sisamanngorpat Parisimi ataatsimeersuartussaapput, ataatsimeersuarnermi silaannaap allanngoriartornera oqaluuserineqartussaavoq. Ataatsimeersuarnerlu sioqqullugu FN-imiit erseqqisaatigineqarsimavoq, silaannaq kissatsikkiartuinnassasoq imarlu nunarsuarmi tamani qaffakkiartuinnassalluni.