Kalaallit Nunaat kalaallit pigaat, taamaattumik kalaallit politikkerii kiisalu Namminersorneq pillugu isumalioqatigiissitat piumasaqaatiminnik aalajangiusimannittuartariaqarput.
Taama allapput, inuit tallimat peqatigiiffinni kattuffinnilu assigiinngitsuni tallimaneersut. Taakkulu tallimat tassaapput:
- Sulisartut kattuffiata SIK-p siulittaasua Jess G. Berthelsen.
- Nunaqavissut suliffiutillit peqatigiiffiata NuSuKa-p siulittaasua Gert B. Lynge.
- Namminiilivinnissamut suliniaqatigiiffiup Namminerup siulittaasua Elisabeth Ravn Johansen.
- Siumut inuusuttaasa SIS-ip siulittaasua Mads Petersen.
- Kiisalu Kattusseqatigiit siulittaasuini ilaasortaq Karl Frederiksen.
Tallimaallutik atsiorsimasaminni tusagassiutinut nalunaarummi ilaatigut ima allassimapput.
- Nuannaarutigaarput politikkerit kalaallit Namminersorneq pillugu Isumalioqatigiissitami ilaasortat nunatta pisuussutaasalu uatsinnut tunniunneqarnissaannik pigineqalernissaannillu piumasaqaateqarnerminnik suli aalajangiusimannimmata, allapput.
Taakku isumaqarput, aningaasat uuliamit isertitsissutaasussat nunatsinnut iluaqutaasussaasut, taamalu Danmarkip tapiissutai ikilisinneqartariaqartut.
- Danmarki pisussaavoq nunasiaateqartutut eqqarsartariaatsimut utersaaqqinnginnissaminut Kalaallit Nunaata pisuussutaanik tilligassalluni, imminuinnaq eqqarsaatigaluni, uffalu nammineq aningaasivini ulikkaaqqangaaqisoq, taama allapput inuit tallimat peqatigiiffinni kattuffinnilu siulittaasuusut, nangippullu:
-Piumasaraarput naalagaaffeqatigiinnermik taaneqartartumi tassaalissanngitsugut pitsaannginnerpaanik pisinnaatitaaffeqartut. Savalimmiunit ajornerusumik pineqarnissarput inooqataaffigisinnaanngilarput. Ajornerusumik pineqassagutta namminersorneq pillugu inatsisissaq siunissaqassanngilaq! Taama tusagassiutinut allagaat ilaatigut nipaqarpoq.