Aalisarnermut ministerit EU-meersut Belgiami Bruxelles-imi ataasinngorpat ataatsimiilissapput, ataatsimiinnermilu aalajangerneqartussat tunngavigalugit nunatta puisinniartartui eqqorneqarsinnaassapput.
Danmark EU-mi nunani kisiartaalluni nunatsinnut attuumassuteqarpoq, puisillu amiinik tuniniaanikkut aningaasatigut iluaqutissarsisinnaasuulluni. Canadamiulli puisinniartariaasiat EU-mi nunanit amerlasuunit akuersaarnartinneqanngimmat, puisit amiinik EU-mut eqqussueqqusiunnaarnissaq eqqarsaatersuutigineqalerpoq.
Puisit amiinik EU-mut eqqussueqqusiornaartoqarnissaa piviusunngussappat, EU-kommission-imiit siunnersuuteqartoqaqqaassaaq akuersissutigineqaqqaassallunilu. Puisilli amerliartornerarneqarmata EU-kommission-i taamatut siunnersuuteqalersaanngilaq.
Allatut iliuuseqalersaarpoq. Tassa puisit avaartarlugit toqorarneqartarnerat assuarliutiginialerunarpaat, taamaassappallu nunatta puisinniartartui aamma eqqorneqarsinnaalissapput.
Puisit amiinik EU-mut eqqussueqqusiunnaarsinnaanissaq EU-mi aalisarnermut ministerit ataasinngorpat ataatsimiinnissaanni sammisassanut ilaanngikkaluarpoq, EU-parlamentimili ilaasortat ministeriminnut kimigiisernermikkut puisit amiisa EU-mut eqqussorneqarunnaarsinneqarnissaat piumasaqaatigisinnaavaat.