Timmisartuussinerup ilai iluatsipput
Sineriassuatsinni silagippallaanngikkaluartoq timmisartuussinissat ilaat Air Greenlandip pilersaarutit malillugit naammassisinnaasimavai, ippassaq kanngissimasut ilaat apuuffissaminnut taamaalillutik apuussinnaasimallutik.
Taamaattorli Nuup Paamiullu akornanni, aamma Kangerlussuup Sisimiullu akornanni timmisartuussinissat silap ajornera pissutigalugu taamaatiinnarneqartariaqarsimapput.
Ilaasussat Københavniliartussat sapinngisamik amerlanerpaat ilaasinnaaqqullugit timmisartorsuaq Norsaq Kangerlussuarmi utaqqisinneqarsimavoq.
Nassiussanut tunngatillugu nassiussat Kangerlussuarmi ippassaq ullumilu katersuussimapput, silali ajussanngippat taakku unnugu aqagulu ullaakkut ingerlanneqarnissaat Air Greenlandip naatsorsuutigaa. Allakkat ingerlaarnerat pissusissamisoorpoq.
Ilaasussat Air Greenlandimit qinnuigineqarput aallarfissat tikiffissallu pillugit Tekst-TV malinnaavigeqqullugu, nittartagaq www naggat airgreenland naggat aamma alakkarneqarsinnaavoq, kiisalu aamma statiionimut paasiniaasoqarsinnaalluni.
