Inuusuttut Inatsisartut ataatsimiinnerat ammarpaa

- Naligiimmik, peqataalluarfiusumik ataqqinnittumillu oqallinneq inuiaqatigiinnut kikkuugaluartunulluunniit tamat oqartussaataaneranni uummataallunilu ingerlatsisuuvoq. Oqallinneq taamaattoq Inatsisartut ataatsimiittarfiata maannakkorpiaq isersimaffigisatta nammineerluni siunertaraa. Inatsisartut siulittaasuat Jonathan Motzfeldt Inuusuttut Inatsisartuisa 33-it 2007-imi pingajussaannik ataatsimiinneranni tikilluaqqusilluni oqaaseqarami oqaatsit taakku anippai.

Inatsisartut siulittaasuata oqaaseqarnermini inatsisinik pilersitsiortorneq eqqaavaattaaq.

-Maleruagassiorneq annertoorujussuanngorsimavoq. Inuiaqatigiinni piffissamilu teknikikkut inuuniarnikkullu annertoorujussuarmik ineriartornermit sunniivigineqarsimasumi tamanna allaanerusinnaagunanngilaq. Tamatuma ajoraluartumik kingunerisimavaa innuttaasut naapertuilluarnermik misigissusiat malinnaajunnaarsimammat. Inuiaqatigiit aalajangiiffigisassanik oqallisiginninnissaannit arlaatigullu isumaqatigiissuteqarnissamit aalajangigassat sukkanerusumik ilaatigut pisinnaasariaqartarput. Inuusuttut Inatsisartuini 2007-mi peqataasutut ulluni tulliuttuni misigissavarsi qanoq ilaanni sukkatigisumik pisoqartartoq. Inatsisartuni siulittaasoq Jonathan Motzfeldt Inuusuttut inatsisartuisa ataatsimiinnerat aallarnerlugu ilaatigut taama oqarpoq.

- Tamat oqartussaaqataanerat atorlugu oqallinneq iluatsippat inuiaqatigiit uagut iluatsissaagut. Taava inatsisit aalajangiinerillu malitsigititatut akuersissutigineqartut iluatsissapput, taakkumi naapertuilluarnikkut piumasaqaatinik piffissap ingerlanerani allanngorsimanngitsunik eqquutitsisimassammata. Naapertuilluannginneq qanorluunniit ittoq inuunissinni naapitassarsi oqallinnerup, ataqqinninnerup tusaaniarnerullu amigaataaneranik patsiseqarumaarmat qularutigissanngilarsi, Jonathan Motzfeldt inuusuttut inatsisartut ataatsimiittarfianut tikilluaqqugamigit oqarpoq.