Jens Peter Lange unnerluunneqarpoq

Pinngortitamik Avatangiisimillu Illersuiniaqatigiiffiip, Uppiup, siulittaasua, Jens Peter Lange, peqquserluuteqarsimasutut NunaFondip, unnerluutigaa, Sermitsiaq ullumi saqqummersoq allappoq.

Eqqartuussivikkoortitsineq suliassami killiffiugallassaaq, suliniummut ingerlanneqarsimanngisaannartumut Uppik tapiiffigineqarsimalluni.

Aningaasat Jens Peter Langemut 2005-imi upernaakkut tunniunneqarput. Suliniummut nalunaarusiamik arlaleriarluni, kinguneqanngitsumilli, piniartareerluni NunaFondi eqqartuussissuserisumut suliassamik tunniussivoq. Tamatumalu kinguneraa peqquserluuteqarsimasutut Jens Peter Langep politiinut tunniunneqarnera.

NunaFondimi siulittaasup, Kuupik Kleistip, pisimasup ingerlasimanera ajuusaarutigaa:

– Suliassaq pilersimammat uggornarpoq. Aningaasaateqarfiup aaqqissuussaanera tamaat, aningaasanillu aningaasaleeriaaseq, tamatuma kingorna misissulersimavarput. Oqaatigissalluguli ajornakusoorpoq qanoq annertutigisumik sakkortusititsisinnaanersugut. Tassami suliniutinut atatillugu naatsorsuusiortoqartarnissaa piumasarisarparput. Ingerlatallu ataasiakkaat aqunnissaat uagut suliassarinngilarput, Kuupik Kleist oqarpoq.

Jens Peter Langep naatsumik oqaatigaa eqqartuussivikkoortitsinissaq eqqissilluni utaqqillugu.

- Tamatumali saniatigut allamik oqaasissaqanngilanga, aviisimut oqarpoq.