Takornariat tikiinnavillutik nerisassaatitsinnik ussiisinnaalissapput

Nunatsinnut takornariat kalaallit nerisassaataannik misilitassaminnik hotel-ini Mittarfeqarfinnilu pisiaqarsinnaanngorput.

Isumassarsiatsialak tamanna Narsami Inuussutissalerinermik Ilinniarfimmi, Inuilimi, ukiup ataatsip matuma siorna inuussutissat pillugit isumasioqatigiittoqarmat saqqummiunneqarpoq.

Isumassarsiamik timitaleeqataasoq Tina Donnerstag Maniitsumi Arctic Green Food -mi nioqqutissanik pitsaassusiliinermi pisortaq aammalu ineriartortitsinermi akisussaasuusoq tamanna pillugu ima oqarpoq.

Siullermik Narsarsuarmi akunnittarfik kalaaliminernik tuniniaanissaanik isumaqatigiissuteqarfigisimagitsik, Tina Donnerstag oqarpoq nangipporlu.

- Tassa takku kalaalimerngit- assersuutigalugu tammajuitsunik takornarianut tuniniaanermi periaatsit atorlugit ooqattaagassatut tuniniarneqarnissaat isumaqatigiissutigeqqaarparput.

Karseerannguaq qisummik sanaaq kipparissunik immikkut ilitsiveeralik kalaaliminernik assigiinngitsunik arfinilinnik imaqartoq misiligutigalugu tuninarneqalersimavoq. Imaasa ilagaat quppersagaarannguaq kalaalimerngit piniartumiit pisaanerminnit pisisartumut apuunnerannut paasissutissiissut.

Karsip imarai appaliarsuit puguukkat, umimmaap neqaa pølsiliaq, nipisat suaat, raajat qalipallit, qullukkat taavalu sermersuamineq.

Takornarianut misilitassiissutit taakku aallaqqaammut misiligutaasumik akunnittarfinni, mittarfeqarfinni Brugsen-inilu tuniniarneqaqqassasut, Tina Donnerstag oqarpoq.