Nunat tamalaat timersuutinik unammiuaarlutik Olympiadeqartarnerini tamani, olympiadep innera ikumajuartoq, nunamut olympiaderfiusussatut tullinnguuttumut kingoraaqattaalluni arpattunit tamatigut ingerlanneqartarpoq.
Olympiademik unammersuarnissaq tulleq Kina-p illoqarfissuisa pingaarnersaanni Beijingimi aappaagu 2008-mi pissaaq, olympiadillu innera pileqqaarfianit Grækerit nunaannit Kina-mut arpattunit kingoraaqattaattunit ingerlanneqartussaavoq.
OL-ip Innerata aqqutissaa aaqqissuuteqqissaarneqarpoq, Kina-miullu pilersaarusiortut isumassarseriataarsimapput, innerup nunarsuarmi qaqqarsuaqarfiit portunersaat aqqusaartussaammagit, nunarsuarmi qaqqat portunersaat Mount Everestip inngia avaqqutiinnartariaqanngikkaa.
Olympiadep innera qamiuitsoq Mount Everestip 9 kilometeringajannik portussusillip qaavanut silaannaqanngingajattumut pissunneqassaguni qamitaannginnissaa Kina-mi maanna isumaliutigeqqissaarneqartoq Kina-miut nutaarsiassaqartitsiviat Xinhua tusarliussivoq.
Pilersaarutigineqarpoq inneq Mount Everestip kujataanit majuunneqariarluni avannaatigut aqqunneqarumaartoq, tamannalu piviusunngussappat, olympiadip innera oqaluttuarisaanermi siullerpaamik qaqqarsuit portunersaatigoorunneqassagaluarpoq, soorunami olympisk kommitè akuersisinneqarsinnaassappat.