VIDEO Qeqertarsuaq ivigaasaaqqanik arsaattarfittaalersoq
![](/sites/default/files/styles/image_934x467/public/oembed_thumbnails/2022-12/Fv6W7iTRAJjiWC5XFt6HxY77EEu3H6utMYiczFkRpZw.jpg?itok=57heTHxA)
- Nunarsuarmioqatitsinnut anngunniassagutta, siunissaq eqqarsaatigalugu, ivigaaqqanik arsaattarfinnik sapinngisamik pilersitsisoqartussaagami nunatsinni. Una eqqartugarput imaappoq, ivigaaqqanik arsaattarfik Qeqertarsuup arsaattarfiatut angitigisoq pissarsiarisinnaavarput, arsaattarfiliornissamut komitémi siulittaasoq, Jens Mølgård, KNR-imut taama oqarpoq.
Pioreersoq qalliinnarnagu nutaavissuarmik arsaattarfiliortoqassaaq
Arsaattarfissaq illoqarfiup avannarpasinnerusortaani Akinnguani sananeqarnissaa siunniunneqarpoq. Tamanna pisariaqarsimavoq arsaattarfiup pioreersup qalliinnarneqarsinnaannginnera peqqutigalugu:
- Ivigaaqqanik arsaattarfiliortartut nunatsinni kissaatigisimavaat qaarsumiinnissaa. Qaarsoq nikerartuunngimmat sapinngisamik kissaatigineqarsimagami. Arsaattarfik pioreersoq sioraannarsuugami nunalu nikerarusaartarami soorunami, taamaammat taamaattumiinnissaa kissaatigineqarsimanngilaq.
Taamaattumik arsaattarfipput qalliinnarneqarsinnaanngilaq, aamma maanna arsaattarfipput atorunnaarnavianngilarput, atortuassavarput soorunami aamma, Jens Mølgård oqarpoq.
Qeqertarsuarmiu kilisaataatilik tunissuteqartuuvoq
Arsaattarfissaq qeqertarsuarmiup kilisaataatillip Polar Seafoodimillu piginneqataasup Jens Sallingip tunissuteqarneratigut piviusunngorsinnaanngorpoq. Suliniullu pillugu suleqatigiissitaliortoqarsimavoq:
- Komitép misissorlugu aallartinnikuuaa Danmarkimi ivigaaqqanik arsaattarfiliortartut attavigalugit. Maannakkumut paasisagut malillugit ataaseq akinikuuvoq, sisamat attaviginikuullutigit.
Tassalu arsaattarfitta pioreersup angeqqataa suliarineqassaguni 1,8 millioninik taggissimavaat, ungalulerlugu qullersuillu ilanngutereerlugit.
Aningaasat sinneruttut atortussat nassiunnerinut sulisoqarnermullu atorneqartussaasut Jens Mølgårdip oqaatigaa.
Naallu arsaattarfissaq qulakkeerneqapajaareeraluartoq nunagissaanissamut aningaasartuutissanut aningaasaliisinnaasunik suleqatigiissitaq ujarlerallassaaq.