Oqarasuaatikkut oqaloqateqartarnerput ukiortaamiit akikinnerulissaaq. Oqarasuaatinik atuinerup akikinnerulernissaa telep sullissinerinut tamanut, tassa oqarasuaatit angallattakkat ilanngullugit atuutissaaq.
Taama akikinnerulersitsinissaq Naalakkersuisunit akuerineqartumik ukiumut 17,3 millioni koruuninik sipaarnermik kinguneqassasoq, Tele Greenland nalunaarpoq.
- Oqarasuaatinik atuinerup akikinnerulernissaata atuisartunut iluaqusiinera, Telellu sullissinikkut taama ineriartortitsinera nuannaarutigaara, Attaveqarnermut Naalakkersuisoq Jørgen Wæver Johansen oqarpoq.