Tony Blair politiinit killisiorneqarpoq
Tuluit Nunaanni ministeriuneq, Tony Blair, partiialu Labour, pisoorsuarnik akimaninngortitsisarsimasutut pasineqarlutik tuluit politiivinit ullumi killisiorneqarpoq.
Partiip Labourip karsiannut aningaasaliilluartarsimasut akimaninngortinneqartarsimanerat apeqquserneqarpoq.
Tuluit tusagassiorfii naapertorlugit akunnerni marlunni killisiuisoqarpoq. Labourip oqaaseqartartua taama ilisimatitsivoq.
- Tony Blair Downing Street-imi naalakkersuisut allaffianni killisiorneqarpoq, killisiuinermili eqqartuussisuserisoq najuussimanngilaq, oqaaseqartartoq oqarpoq.
Tony Blair ilisimannittutut pasisaasimanngitsutullu killisiorneqartoq oqaaseqartartup erseqqissaatigaa.
Blair-ip killisiorneqarneratigut politiit pisoq tuluit nalakkersuinermik ingerlatsuineranni naalakkersuisunilu qullerpaanut anngunneqarpoq.
Labour-imi qullersat ilaat illuatungiliuttunilu siuttut ilaat politiinit siornatigut killisiorneqareerput.