Finn Karlsen: - Nunami allamiunut paasisitsiniaasariaqarpugut!
Piniarnermut Aalisarnermullu naalakkersuisup Finn Karlsenip qilalukkanik pisasseeqqittariaqarsimanini sunik tunngaveqarnersoq maanna nunani allamiunut paasisitsiniaassutigisussanngorpaa.
Maannami qilalukkanik pisassat 385-inngortinneqarput naak NAMMCO Pinngortitaleriffillu 135-iinnarnik pisasseeqqusigaluartut.
- Suliassarput annertoorujussuanngorpoq tassami paasisitsiniaasariaqarpugut, aammalu tusagassiorfitsigut oqaatigereerpara NAMMCO-mi paasisitsiniaasimallunga, annertoorujussuarmik nunatsinni qilalugaqarneq pillugu paasisitsiniaareerpunga, Finn Karlsen oqarpoq.
Taanna erseqqissaavoq nassuaanermini ilanngullugu eqqartorsimagini biologitta qanoq piniartunik suleqateqarluartiginerat.
Finn Karlsenip aamma assersuutigalugit taakkartorpai akitsinni Canadami biologit oqaluttarsimasut piniartut eqqorluinnartumik oqaluttarnerarlugit.
- Taamaattumik aningaasaleeqqinniarpugut taamaalilluta uagut biologitta Canadamiullu bioloogiisa suleqatigiillutik eqqornerusumik uagutsinnut paasissutissiisarnissaat anguniarlugu, Finn Karlsen oqarpoq.
Taanna aperaarput, biologit qilalukkanik 135-inik pisassiinissamik innersuussuteqarsimasut taakkulu pisassiissutaat qanoq ajoquteqarsimanersoq.
- Ikippallaaqaat NAMMCO-mi ilungersorlunga oqaatigaara qilalukkat 135-iinnaat pisassiissutigineqartut nunatsinni pisassiissutiginissaat ikippallaarujussuarput, oqarpoq.
Erseqqissaavoq siusinnerusukkut sikunerusarallarmat qilalukkanik sassisoqartartoq taamalu qilalugarpassuit sikup ataani toqorartarsimasut, aasakkullu ungusisoqartarmat ukiumut 1000-erpassuit toqorarneqartarsimasut.
- Ukiuni makkunani ikittuaraarakasiit kisimik pisarineqartarput taamaattumik qilalukkat nungulersutulluunniit oqaatigineqarsinnaanngillat soorluttaaq piniartunit tamanna erseqqissarneqartartoq taakkulu uanga upperilluinnarpakka, Finn Karlsen oqarpoq.
