Qaleralittassat nungummata suliffissaaleqisut amerlipput
- Siornamut sanilliullugit suliffissaaleqisut ikileriaraluartut, nunaqarfinni suliffissaaleqisut marloriaatinngorput, Qaasuitsup kommuniani suliffeqarnermut tunngasuni ataqatigiissaarisoq Thora Siegstad oqarpoq.
Upernavik Seafoodimiillu tunitsivinni sulisut 100 maannamut angerlartinneqareertut, pisortaq Flemming Andersen oqarpoq.
- Sulisutta affaat suliassaqartinnginnatsigit angerlartittariaqarsimavagut, umiatsiaararsortut, tassa angallatillit 6 meterinit minnerusunit qaleralinnik tunisisorisaraluarpagut, Upernavik Seafoodimi pisortaq, Flemming Andersen tunitsivinni sulisut 100 maannamut angerlartinneqarsimasut pillugit taama oqarpoq.
Qaasuitsup kommunianilu suliffissaaleqisut siorna oktobarimut sanilliullugit ikinnerungaluartut, nunaqarfinni suliffissaaleqisut marloriaatinngortut, Qaasuitsup kommuniani suliffeqarnermut ataqatigiissaarisoq Thora Siegstad oqarpoq.
- Illoqarfinni oktobari qaammat763-usimapput, taava nunaqarfinni 526-it. Siornamut sanilliullugit suliffissaaleqisut ikileriaraluartut, tassa imaappoq siorna illoqarfinni oktobari qaammat suliffissaaleqisut 1073-iungamik, nunaqarfinni 269-it, tassa imaappoq nunaqarfinni suliffissaaleqisut marloriaatinnguusapput ukioq manna qaammat oktobarip, nunaqarfinni suliffissaaleqisut amerlipput, Thora Siegstad oqarpoq tamannalu qaleralittassat nungunnerisigut suliassaarunneqarmik tunngaveqarnerusoq oqaatigaa.
-Tassani Uummannami suliffissaaleqineq nunaqarfinni qaffariarput aammalu Upernavimmi, taakkua qaleralinnut tunitsiviit malunnaataanerupput, tassa qaleralittassaarunneq, Thora Siegstadip tunngaviusoq oqaatigaa.
Upernaviup nunaqarfiini Upernavik kujallermi, Kangersuatsiami, Aappilattumi, Nutaarmiuni, Nuussuarmi aamma Kullorsuarmi Upernavik Seafoodip tunitsivii maanna matoqqapput, qaammaatillu tulliani umiatsisaararsortunut qaleralittassat 50 tonsit aalisarneqalerpata ulluni marlussunni tunitsiviit maanna matoqqasut ammaqqissinnaassasut, Flemming Andersen nassuiaavoq.
- Qaleralittassat 50 tonsit decemberip aallaqqaataani aalisarneqalersinnaapput, silalu ajunngippat iluatsitsissanguttalu sapaatip akunnerata missaani tunitsiviit ammatissinnaassavagut, Upernavik Seafoodimi pisortaq Flemming Andersen oqarpoq.
