Danmarkimi sulisartut akornanni suliassarpassuaqaraluaqisoq Suliffeqarfiit sulisussarsiornermik suliaqartartut maanna sanasut akornannut noqqaassutigilerpaat nunatsinni sanaartugassanut suli inuttalerneqanngitsunut qinnuteqartaqqullugit.
Suliffeqarfik sulisussarsiortartoq Danmarkip ilaani Ribe-miittoq GreenCom nunatsinnukartitsisarpoq, maannalu suliffeqarfiup taassuma sulisussat Norge-meersut Sverigemeersut Tysklandimeersullu nunatsinnut suliartoqqullugit kajumissaartalersimavai. Oqaatigineqarporlu Tysklandip avannaaneersunit nunatsinnut suliartornissamik neqeroorut soqutigineqarsimaqisoq. GreenComsip piginnittaa Søren Pedersen ima oqarpoq.
- Tysklandip avannaaneersunik sulisussanik pissarsikutsoortoqarsinnaavoq, ilinniarluarsimapput danskillu sanasuisulli pikkoritsigalutik.
Søren Pedersen erseqqissaavoq Danmarkimi sanasut nunaminni suliassaaleqisimanngeqisut aammalu atugassarissaartitaalluaramik Danmarkimi uninngarusunnerusartut.
Suliffeqarfiup sulisussarsiornermik suliaqartup GreenComip sanasut 100-t ukiut tamaasa nunatsinnut suliartornissaat sulissutigisarpaa.