Angut 24-nik ukiulik Narsarmiu politiinit decembarip ulluisa 22-ata tungaanut tigummigallarneqarpoq. Angutip taassuma arnaq 37-nik ukiulik tallimanngornerup arfininngornerullu unnuaani pinngitsaalillugu Narsami arneriffigisimavaa.
Sermitsiaq naggat gl malillugu, angut 24-nik ukiulik arnap ullaassakkut pingasunngulernerani naapissimavaa, arnallu angerlaqatigerusunnginneraani angut aperisimavoq.
- Angut inuusuttoq aallaqqaammut ajunngisaarsimavoq, arnallu angerlaqatigissallugu akuersaarpaa, Narsami politiit ittuat, Olav Nielsen, oqarpoq.
- Angutip 24-nik ukiullip arnaq tassanngaannaq uppitippaa unatalerlugulu, pinngitsaalillugu angerlaappaa, apuukkamilu arnaq atisaajaquvaa, kingornalu pinngitsaalillugu. Angut artulermat arnaq qimaasinnaasimavoq.
- Arnaq taanna Narsarmiuunngilaq, illoqarfimmullu tikerlaajulluni, Olav Nielsen oqarpoq.
Arnaq takusani aallaavigalugit politiinut nassuiaalluarsimavoq, taamaasillutillu angut pinngitsaaliisoq nassaarineqarsinnaasimalluni. Angut politiinit apersorneqaqqaarami arnamik ilaqarsimanini eqqaamanerarpaa, eqqartuussivimmili sassartinneqarami eqqaamasaarunnerarsimalluni.
- Arnap atisaasa ilaat angutip inaani nassaaraavut, qimaanermini tigunngitsoorsimasai.
24-nik ukiulik Narsap eqqartuussiviani arfininngormat sassartinneqarpoq, decembarillu ulluisa 22-ata tungaanut tigummigallarneqalerluni.