Timmissat ilaat, naajannguaq, ilaatigut Qeqertarsuup eqqaani Tunullu avannaani uumasuusoq, Californiami naammattoorneqarsimasoq timmissanik soqutigisalinnit assorsuaq soqutigineqarpoq.
Naajannguaq aatsaat taamak kujasitsigisumi takuneqarsimavoq – tassa uumaffigisaminit kilometerinik hunnorujunik arlalinnik kujasinnerusumiittoq takuneqarsimagami, aviisimi Los Angeles Times-imi taama allaaserinnittoqarpoq.
Nalinginnaasumik timmiaq taanna Sibiriami nunatsinnilu uumasuuvoq aamma qaqutigorujussuaq Canadap USA-llu killeqarfiata kujataani takuneqartarpoq, taamaattumik uissuummissutigineqaqaaq Californiami seqinnerajuttorsuarmi kiattumilu takuneqarsimammat.
Timmissap Amerikap kujataanut tikeraarnera timmiarsiuut soqutigisorujussuuaat taamalu takuneqarfianut ussagartorsuullutik.
Angut aviisimut oqaluttuarpoq nalunaaquttap akunneri qulit biilinik ingerlaarsimalluni, naajannguaq takutsiarumagaluarnermit – tassa timmissap tingereersimanissaa qulakkeeqqaanngikkaluarlugu.
Taamaattorli naajannguaq nunatsinni takorusukkukku iluatsitsisariaqassaatit imaluunniit utaqqisinnaassaatit.
Lars Witting Pinngortitaleriffimmeersoq oqarpoq timmiaq taanna nunatsinni qaqutigoortuusoq iluatsitsillunilu aatsaat takuneqarsinnaasoq.