Atassutip isummani allanngortilluinnarpaa
Atassutip isummani ippassaq allanngortilluinnarpaa.
Landstingimi kommunit kattussuunnissaat pillugu suliap suliarineqarnerani Atassut akerliujuarsimasoq ippassaq akuersaaleriasaarpoq.
Ataatsimiititaliami suliarineqarnerata nalaani taasisoqalerpat itigartitsiniarlutik Atassutikkormiut nalunaaraluarput.
- Atassutip inatsisartuni gruppiani sakkortuumik oqallisigereerlugu, sinerissami kommunini ilaasortaatitavut tamakkinngikkaluarlugit tusarniaavigaavut, tamavimmik, kommuni ataaseq kisiat pinnagu, isumaqataapput, taamaammallu isumaqataalluta aalajangerpugut, akerliulluta suleqataalissagaluarutta nuanniilliorluta sulissagatta, suleqataarusussuseqarnermilli takutitsigutta nuannaarluta ingerlaqqissagatta, Finn Karlsen oqarpoq. Atassutip siulittaasuata naalakkersuisooqataanertik navianartorsiortinneqalissasoralugu akuersaaqataasariaqarnermik aperineqarami itigartippaa.
Inatsisartuni ilaasortap Augusta Sallingip taaseqataannginnera inuttaanut kinguneqarnerluttussaanngitsoq Finn Karlsen oqarpoq.
rth@knr.gl
