Hans Enoksen: Naalakkersuisuni piumasarineqartut Dorisip naammassinngilai

Naalakkersuisut siulittaasuat Hans Enoksen KNR-imut oqarpoq Doris Jakobsen pilliutigineqarnissaa Inuit Ataqatigiinnit piumasarineqarsimanngitsoq, oqarlunili Doris Jakobsen-ip kultureqarnermut, ilinniartitaanermut, ilisimatusarnermut, ilageeqarnermullu naalakkersuisutut piumasarineqartut naammassisimanngimmagit tunuartitaasoq.

- Naalakkersuisutut piumasarineqartut naammassisimanngilai, naalakkersuisullu piumasaat assortortarsimavai, taamaammat tunuartittariaqarsimavara, Hans Enoksen oqarpoq, erseqqissaatigalugulu nammineq tamanna aalajangigarisimallugu, Inuit Ataqatigiillu tamanna piumasarisimanngikkaat.

Naalakkersuisuusimasoq ullumi siusinnerusukkut oqarpoq peqqissutsimut naalakkersuisuusimasup Asii Chemnitz Narupip innuttaasut peqqissuunissaannik suliniutaanik isornartorsiuisimanini taassumanngalu unitsitsiniarsimanini pissutigalugu tunuartitaalluni.