Royal Greenlandip kisermaassilluni inissisimanini aalisartunut neqitassanik tuniniaanermini atornerluppaa. Unammilleqatigiinnermut ataatsimiititaliap aalajangiiffigisaani tamanna takuneqarsinnaavoq. Aalisakkanik tunisassiorfissuup akinik politikkia ukioq nutaaq aallarnerfigalugu allanngussaaq.
Royal Greenland A/S-ip aalisartunut Royal Greenlandimut tunisisartunut tunisisanngitsunullu neqitassanik tuniniaanermini akinik assigiinngisitsisarnera, unammilleqatigiinnermut inatsimmik unioqqutitsivoq.
Tamanna unammilleqatigiinnermut ataatsimiititaliami aalajangiiffigineqarpoq.
Unammilleqatigiinnermut ataatsimiititaliaq Royal Greenland A/S-ilu sapaatip akunnerata siuliani isumaqatigiipput, neqitassanik tuniniaanermi akinik assigiinngisitsisarneq ukioq naatinnagu atorunnaarsinneqassasoq.
Neqitassanik pisinermi akinik assigiinngisitsisarneq Ukkusissani KNAPP-ip immikkoortortaqarfiata naammagittaalliutigisimavaa.
Tassani aalisartut Royal Greenland-ip tunitsivianut tunisisartut ammassanik neqitassatut atugassanik pisinerminni kilomut 5 koruuninik akiliisarput, akerlianillu aalisartut namminersortunut tunisisartut 11 koruuninik kilomut akiliisinneqartarlutik.
Aalisartut tunitsivinnut allanut tunisisartut ammassassuarnik amikunillu neqitassatut atugassanik pisinerminni kilomut 4 koruuninik qaavatigut akiliisinneqartarput.
-Akinik assigiinngisitsisarneq unammilleqatigiinnermut inatsimmik unioqqutitsineruvoq, Royal Greenlandimmi taamaasilluni kisermaassilluni inissisimanini atornerlullugu, aalisartut minnerusumik annerusumilluunniit naalakkerlugit Royal Greenlandimut tunisisittarpai, Unammilleqatigiinnermut Ataatsimiititaliami siulittaasoq, Carl-Aage Skovaa, oqarpoq.
Royal Greenlandip Unammilleqatigiinnermut ataatsimiititaliaq ataatsimeeqatigereerlugu isumaqatigaa, neqitassanik tuniniaanermi akinik assigiinngisitsisarneq 2007-mi januaarip aallaqqaataa aallarnerfigalugu atorunnaarsissallugu.
Neqitassanik tuniniaanermi akinik assigiissitsilerneq nuna tamakkerlugu atuutsinneqalissaaq,
Uummannap eqqaaniinnaanngitsormi aalisartut sumut tunisisarnerat aallaavigalugu neqitassat akiinik assigiinngisitsisoqartarpoq.
- Neqitassat akii ukioq nutaaq aallarnerfigalugu tamarmik assigiilissapput, Royal Greenlandimi ingerlatsinermik siunnersorti, Niels Bjerregaard oqarpoq.
Neqitassat akikinnerit akii qaffassanersut, Royal Greenlandimi ingerlatsinermik siunnersortip oqaatigisinnaanngikkallarpaa