Upernaviup kommunia tarngutiliornialerpoq
- Puisip orsua uulialiaralugu nakorsaasiornissamut aammalu kiinnamut timinullu tarngutiliornissamut, creme-iliarissallugu piareerpugut. Norge-mi suliffeqarfiup Polar Godt–ip taamaattut tunisassiarereerpai, tassalu suleqatigiilerpugut piniartortatta puisitaasa orsuanik misileraallutik upernaamiit pisiortukkatik misissoreerlugit akuerimmatigit, taama oqarpoq Jens Immanuelsen, Upernavimmi borgmesteri.
Ukiut kingulliit marluk ingerlanerini puisit amii tunineqarsimasut aallaavigalugit 30 – 35 tusind-it puisit pisarineqarsimapput. Taakkualu orsui kisiisa eqqarsaatigissagaanni tonserpaaluussapput. Taamaattumik Upernaviup Kommuniata Norge-mi suliffeqarfik Polar Godt A/S suleqatigilersimavaa, puisit orsuinik imerpalasumik imertakkamik nakorsaasialiassamik atugassanik aammalu kiinnanut timimullu creme-imik nioqqutissiornissamut atugassanik misileraalluni upernaamiit orsuerniartoqarsimalluni.
- Norge–mi suliffeqarfiup nalinginnaasumik nioqqutissiarereerpai. Pilersaarutaavorli maani Upernavimmi maqitsiviliortoqassasoq minguiaaviliorlunilu, tassa suliffeqarfiup suleqatitta pingaartikkamikku piffimmi pisortorfiusumi suliassaq naammassillugu suliarineqarnissaa, Jens Immanuelsen nassuiaavoq.
Kisianni nioqqutissiat aallaqqaammut Norge–mi suliarineqartarallassasut Jens Immanuelsen aamma oqarpoq.
Suliffeqarfissap puisip ilivitsuutillugu tunisassiarinissaa siunertaraa. Piginneqatigiiffittullu ingerlalissammat ataatsimeersuartitsinissaq tullinnguuttoq Jens Immanuelsen oqarpoq.
