Savalimmiormiut islandimiullu killilersugaanngitsumik niueqatigiinnissamik isumaqatigiissuteqarput. Isumaqatigiissut, nioqqutissanik, aningaasanik, sullissinermik sulisoqarnermillu, killilersugaanngitsumik paarlaasseqatigiitarnissamik imaqarpoq.
Sulisoqarnermi nioqqutissatigullu paarlaasseqatigiittarnissani sumiuussuseq nioqqutissallu suminngaanneernerat pissutigalugit immikkoortitsisoqartassanngitsoq isumaqatigiissutigineqarpoq.
Island-ip Savalimmiullu isumaqatigiissuteqarnerat sioqqullugu nunat taakku marluk nunattalu killeqanngitsumik niueqatigiissinnaanerat Inatsisartuni oktobarip 24-anni oqaluuserineqarmat,
isumatigiissutissaq nunatsinnut iluaqutaassanerarlugu nunat avannarliit killiit siunnersuisoqatigiiffianni isumaqartoqaraluartoq, taamaattoq nunatta ilanngunnissaa naalakkersuisunit isumaliornartoqartinneqartoq, Nunanut Allanut tunngasunut Naalakkersuisoq, Josef Motzfeldt, oqarpoq.
- Sanilitsinnut taakkununnga immikkut ittunik neqeroorutissaqanngilavut, nioqqutissaativummi islandimiut savalimmiormiullu namminneq pigereerpaat. Josef Motzfeldt, Inatsisartut oktobarip 24-anni ataatsimiinneranni taama ilaatigut oqarpoq.
Savalimmiormiut nunani assigiinngitsuni tallimani pisiortorfeqarput, Danmarkilu pisiortorfiginerpaagaat Savalimmiuni naatsorsueqqissaartarfimmi atuarneqarsinnaavoq.