Nunatsinni timmisartuussineq ullumikkut kinguaattoorfiussaaq, Norsaq teknikkikkut akornuteqarmat, aamma nunatta Kitaata sineriaani silarlunnera pissutigalugu. Air Greenland taama nalunaaruteqarpoq.
Nunatta Kitaa silarluppoq, taamaattumillu ullumikkut novembarip pingajuanni timmisartuussineq tamakkerluni nalunaaquttap akunnerinik arfineq-marlunnik kinguaattoorfiuvoq.
Tamatuma saniatigut Atlantiku qulaallugu ikaartaat, Norsaq, Kangerlussualiartussaq teknikkerluni taamatuttaaq nalunaaquttap akunnerinik arfineq-marlunnik kinguaattoorpoq.
Silarlunnera pissutigalugu Air Greenlandip nunatta Kujataani timmisartuussinissani ullumikkut taamaatippaa, tassa qulimiguulik S-61, atortussaminik amigaateqarluni Narsamiittoq, silarlunnera pissutigalugu pajunneqarsinnaanngikkallarmat.
Ullumikkut timmisartuussinermi ilaasut nassiussallu kinguaattoornernit eqqugaapput, ullumikkummi nassiussanik timmisartuussinissaraluaq taamaatiinnarneqarmat.