Oktobarimi toqutsisoq tigummineqarallartussanngortitaavoq
03. november 2006 05:32
Nuummi arnamik 43-nik ukiulimmik oktobarip ulluisa aallaqqaataanni toqutsineq politiinit suli misissorneqarpoq.
Toqutsisutut pasineqartoq, angut 36-nik ukiulik, killisiorneqareerluni, arnamik savimmik kapisisimalluni nassuermat, politiinit sapaatip akunnerini sisamani tigummineqarallartussanngortinneqarpoq.
Vicepolitimester Bjørn Bay Radioavisimut oqarpoq, angutip pasineqartup tigummineqarnera sapaatip akunnerinik sisamanik sivitsoqqinneqassasoq.
Arnaq savimmik kapisimallugu angutip aallaqqaammut nassuerutigaa, politiilli oqarput angut toqutsisimasutut nassuersimanngitsoq.
Toqutsineq suli misissugarineqarmat, politiit suliaq pillugu annertunerusumik oqaaseqarsinnaanngikkallarnerarput.
