Keld Askær: -Ilinniaqqinniarama tunuarniarpunga
Ukiut aqqaneq-marluk nunatsinneereerluni, nunatsinnilu suliffissuit annersaanni Royal Greenlandimi ukiuni tallimani pisortaareerluni Keld Askær decemberip naanerani taamaatittussanngorpoq.
Keld Askærip Danmarkimut uternissani aalajangiussimavaa. Ilaquttani pingaaarnerutilerpai qaffasinnerusumillu ilinniarniarpoq.
Keld Askær qaammatip aappaata affaata missaa qaangiuppoq Royal Greenlandimiit soraarnissaminik aalajangerami. Aperaarpullu suliassani naammassillugu misigisimaneraa.
- Piffissap ingerlanerani angusaqarpunga kisianni soorunami ilaatigut takorusussinnaagaluarpakka piginnittut aaqqissuussaanikkut nutaaliornerat. Taamatulli aamma takorusutsigaara suleriaatsinik pisariillisaasoqarnerup kinguneranik sulisut allanik periarfissinneqarnerisa ineriartortinneqarnerat.
Tamakkuli tamaasa takunngitsuussavakka. Suliassat nutaat takkuttuaannarput allat naammassisullu allat takkuttarput, Royal Greenlandip pisortaanera Keld Askær oqarpoq.
Taannattaaq erseqqissaavoq, nunarsuarmiut imminnut qanilligaluttuinnarnerisa nalaanni nukinnik allanik pilersitsisoqarnissaa pisariaqartinneqartoq. Suliffeqarfissuup Royal Greenlandip tamakkiisumillu Namminersornerullutik Oqartussanit pigineqartup allanik avataaneersunik piginneqateqarnissani aamma pisariaqartikkaluarpaa, taamaalilluni imminut mattusimanngitsumik ingerlasinnaassagaluarami. Keld Askær oqarpoq
Paaviaaraq Heilmann aperaarput, pisortassap kalaallisut oqalussinnaanissaa siulersuisut pingaartinneraat.
- Suleqatigiissitap taanna aamma nalilersugassarissavaa uani massakkut oqaatigissanngilara, akivoq. Ingerlatiinnarlugu aperaarput nammineq piukkunnartinneqarnersoq.
- Tusagassiortunit apeqqutigineqarpoq. Pingaarnerpaavoq, suliassap pitsaasumik suliarinissaa. Suliffeqarfissuaq angisuujuvoq nunatsinnut pingaaruteqarpoq, attavigisagullu bankit soorunami kusanartumik pitsaasumillu attavigisassavut. Bankimi oqaloqatigaagut taakkulu isumaqatigiissutinut allanngortitsinianngillat, Royal Greenlandip siulersuisuini siulittaasoq Paaviaaraq Heilmann taama oqarpoq.
